Bugungi kunda Rishton tumanida ham maktabgacha ta’lim muassasalari tarmog‘ini kengaytirish, ularning moddiy-texnik bazasini mustahkamlash, yangi bog‘chalar qurish bo‘yicha muayyan ishlar amalga oshirilmoqda.

Eng ulug‘, eng aziz ayyomimiz – davlatimiz mustaqilligining 34 yilligi arafasida “Qo‘shqayron” MFY hududida “Parizoda” nomli 50 o‘rinli yana bir zamonaviy oilaviy maktabgacha ta’lim tashkiloti foydalanishga topshirildi.

Mazkur loyihani tashabbuskor tadbirkor Nozimjon Azizov o‘z mablag‘i hisobidan tashkil etdi.

Oilaviy maktabgacha ta’lim tashkiloti jahon standartlariga mos keladigan, SamPin me’yori talablariga javob beradigan, zamonaviy ta’lim sifatini o‘z ichiga olgan ta’lim maskani sifatida barpo etildi.

Tantanali ochilish marosimida O‘zbekiston mahallalari uyushmasi Farg‘ona viloyati boshqarmasi boshlig‘i A. Ziyavitdinov, Rishton tumani hokimi Bahodirjon Xoliqov, tuman hokimligi mutasaddilari, maktabgacha ta’lim tizimi xodimlari va mahalla faollari ishtirok etishdi.

Tadbirda so‘z olgan tuman hokimi keyingi yillarda mamlakatimizda bolajonlarni har tomonlama barkamol qilib tarbiyalash davlatimiz siyosatining ustuvor yo‘nalishiga aylangani alohida ta’kidladi.

Mahalla oqsoqollari Prezidentimizning maktabgacha ta’lim tizimini rivojlantirish, ayniqsa chekka qishloqlarga berayotgan e’tiboridan ota-onalar mamnun ekanliklarini bildirishdi.

— Muassasamizda bolajonlarga ingliz va rus tillari o‘rgatiladi, – deydi rahbar. – Shuningdek, sport to‘garaklari faoliyati yo‘lga qo‘yilgan. Bolalar gimnastika bilan shug‘ullanadilar. Mashg‘ulotlar eng ilg‘or pedagogik texnologiyalar asosida olib boriladi. Yangi bog‘chamizda 5 ta yangi ish o‘rni yaratildi va “Ayollar daftari”da bo‘lgan xotin-qizlarning bandligi ta’minlandi.

Ochilish marosimidan so‘ng mehmonlar tarbiyalanuvchilar uchun yaratilgan sharoitlar bilan yaqindan tanishishdi.